Championat.uz веб сайти мухбирлари қуръа якунига етгач жамоамиз бош мураббийи Равшан Ҳайдаров билан суҳбатлашди.

- Менимча гуруҳимизда тенг кучли жамоалар жам бўлишди. «Ал Наср»ни кучсиз жамоа деб бўлмайди. Арабларнинг барчаси кучли техника ва тезликка эга жамоа ҳисобланадилар. Ундан кейин Саудияда бир мавсум аъло даражада ўйнаган клуб кўп ўтмай кучсизлар сафига тушиб қолиши мумкин. Бу мамлакат чемпионатининг савиясидан далолатдир. «Истиқлол» эса Эрон ишқибозларининг энг севимли жамоаларидан бири. Бу жамоанинг ўйини менга бироз таниш, «Ал Наср» эса умуман бегона жамоа. Бугундан бошлаб гуруҳдаги рақибларимизнинг ўйинини кузатиб, имкон қадар кўпроқ ахборот тўплаб боришга ҳаракат қиламан. Гуруҳимиз нисбатан енгил кўриниш олган бўлсада, бу бизни 1/8 финалдамиз деган хулосага келишимизга асос бўла олмайди.
- Плей-оффдан қайси жамоа гуруҳга етиб келишини истардингиз?
- Ҳиндистонликларни имкониятлари бироз пас деб ўйлайман. Гуруҳ босқичига чиқиш учун асосий кураш «Ал Саад» ва «Ал Иттиҳод» жамоалари ўртасида ўртасида кечса керак. Мен учун гуруҳдаги рақибимизни ким бўлиши эмас, ўз футболчиларимни тайёргарчилиги катта аҳамият касб этади.
- Сўнгги йилларда «Пахтакор»га рақиб жамоаларнинг ўйинини сафарга бориб кузатиш одат тусига кириб улгурди. Февраль ойида араб давлатларига бориб, рақибларингизни ўйинини кузатиш ниятингиз борми?
- Албатта. Сўнгги икки йил давомида мен Саудия Арабистони ва Эрон жамоаларининг ўйинларини кўриб қайтардим. 2011 йил ҳам шундай қиламиз. Имкон борича рақиб ўйинларини тўлиқ ўрганишга ҳаракат қиламиз.
- ОЧЛ-2010нинг биринчи тур учрашуви «Ал Айн»га қарши кечгани учун, «Пахтакор» Туркиядаги машғулотини ўтказиб қайтгач БААда қўшимча йиғин ташкиллаштирганди. Навбатдаги мавсумда ҳам жамоангиз МДҲ кубогида қатнаша олмайди. Шундай экан ОЧЛга жиддий тайёргарлик кўриш учун кичик турнир керак эмасми?
- Тўғри айтасиз. Янги мавсумни БААдаги тайёргарлик билан бошлаймиз. У ердан қайтгач қисқа муддат Тошкентда бўлиб, Туркияга учиб кетамиз.